თბილისის ქუჩაზე მოქანდაკე გიორგი ნიკოლაძის მემორიალური დაფა განთავსდება

ქუთაისში, თბილისის ქუჩაზე

მოქანდაკე გიორგი ნიკოლაძის მემორიალური დაფა განთავსდება. თბილისის ქუჩის N79 ნომერში არსებული სახლის ფასადზე მემორიალური დაფის განსათავსებლად ადგილობრივმა თვითმმართველობამ ტენდერი გამოაცხადა. შესყიდვის სავარაუდო ღირებულება 2 659 ლარია. წინადადებების მიღება 11 თებერვალს იწყება და 16 თებერვალს მთავრდება.
ცნობილი მოქანდაკე 1923 წლის 19 აპრილს, ქუთაისში დაიბადა. გოგილო ნიკოლაძის ძირითადი ნამუშევრებია: “ახალგაზრდა მაიაკოვსკი (ქუთაისის პირველი სკოლის სკვერი, ბრინჯაო; თანაავტორი ვალერიან მიზანდარი), ვასილ კიკვიძის ძეგლი (ქუთაისი, თანაავტორი ვალერიან მიზანდარი), ვასილ ამაშუკელის მემორიალი (ქუთაისი, 1962), სამამულო ომის მემორიალი (ქ. ნაზივაევსკი) და სხვ. მასვე ეკუთვნის გამოჩენილ პირთა შესანიშნავი პორტრეტები: აკაკი (1996), ლადო მესხიშვილი (1985), დავით კლდიაშვილი (1995), აკაკი, ილია, რუსთაველი (ყველა – ეკლარის ქვა, 1992), პეტრე ჭაბუკიანი (1970), ლოტბარი სიმონ კუხიანიძე (1979), მსახიობი კაპია აბესაძე (1979)… გამორჩეულია “მეუღლის პორტრეტი” (1979), “მამის პორტრეტი” (1970), “გაზაფხული” (1979) და სხვ.