„სიძულვილის ენა, რასაც პრემიერ-მინისტრი აფრქვევს, დიდი შიშის დასტურია“-ხატია დეკანოიძე

გაერთიანებული ოპოზიციის ქუთაისის მერობის კანდიდატი ხატია დეკანოიძე, პრემიერ-მინისტრის ირაკლი ღარიბაშვილის სენაკში გაკეთებულ განცხადებას , სადაც თქვა, რომ :”ნებისმიერ მუნიციპალიტეტში სხვა კანდიდატი რომ გავიდეს, ცენტრალური მთავრობის გარეშე, უბრალოდ, პერსპექტივა არ აქვს” გამოეხმაურა და შანტაჟად შეაფასა.

ხატია დეკანოიძემ განაცხადა, რომ ხელისუფლება მზად არის საკუთარ მოსახლეობას საბოტაჟი მოუწყოს. ქუთაისის მერობის კანდიდატი თვლის, რომ სიძულვილის რიტორიკა, რომელსაც ირაკლი ღარიბაშვილი მიმართავს, მეორე ტურში დამარცხების შიშით არის განპირობებული.

” პრემიერ-მინისტრი აშანტაჟებს მოსახლეობას და პირდაპირ ამბობს, რომ თუ ოპოზიციური კანდიდატები გაიმარჯვებენ მეორე ტურში და რა თქმა უნდა ეს ასე იქნება, საქართველოს ხელისუფლება საბოტაჟს გამოუცხადებს საკუთარ მოსახლეობას, რაც არის გაცხადებული დანაშაული საკუთარი ხალხის მიმართ. მისი ეს სიძულვილის ენა, რასაც ის აფრქვევს ყველგან, სადაც ჩადის, დასტურია იმისა, რომ მათ აქვთ დიდი შიში, რადგან იციან, რომ ოპოზიციური კანდიდატები გაიმარჯვებენ. ის პირდაპირ აცხადებს, რომ დაჩაგრავს მათ თუ ისინი გაიმარჯვებენ. მისი ეს განცხადება არის კარგი ფუნდამენტი იმისა, თუ რატომ უნდა იყოს ვადამდელი არჩევნები მეორე ტურში გამარჯვების შემდეგ”, – განაცხადა ხატია დეკანოიძემ.

პრემიერ-მინისტრმა დღეს თქვა, რომ ოპოზიციის კანდიდატების გამარჯვების შემთხვევაში, ისინი ვერაფერს გააკეთებენ, რადგან ცენტრალური ხელისუფლება “ქართული ოცნების” ხელშია.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *