მთავრობის სხდომაზე, პრემიერ-მინისტრმა იმპორტიორებს მედიკამენტების დროულად შემოტანისკენ მოუწოდა.

ირაკლი ღარიბაშვილის განცხადებით, თურქეთის ბაზრის გახსნის შემდეგ, აქვს მოლოდინი, რომ იმპორტიორები ხარისხიან და იაფ მედიკამენტებს ქვეყანაში დროულად შემოიტანენ, რაც მალე გააიაფებს მედიკამენტებზე ფასებს.

„მინდა, კიდევ ერთხელ მოსახლეობას შევახსენო, რომ დაპირებისამებრ, ჩვენ გავხსენით თურქეთის ბაზარი. ახლა იმპორტიორებისგან გვაქვს მოლოდინი, რომ დროულად შემოიტანენ ხარისხიან და იაფ მედიკამენტებს. ამ პროცესს ჩვენ ვაკვირდებით. მინისტრი აზარაშვილი აქტიურად არის ჩართული. მინდა, კიდევ ერთხელ მოვუწოდო იმპორტიორებს, რომ დროულად მოხდეს მედიკამენტების შემოტანა, რაც ჩვენი ვარაუდით, ძალიან მალე გააიაფებს მედიკამენტებზე ფასებს“, – აღნიშნა ირაკლი ღარიბაშვილმა.

შეგახსენებთ, საქართველოს პრემიერ-მინისტრმა ირაკლი ღარიბაშვილმა 17 იანვარს განაცხადა, რომ ხელი მოეწერა მთავრობის შესაბამის განკარგულებას და თურქეთის ბაზარი გაიხსნა. მისივე თქმით, თურქეთიდან საქართველოში შემოვა მაღალი ხარისხის, gmp-სტანდარტების შესაბამისი მედიკამენტები. პრემიერის განმარტებით, ფასებს შორის სხვაობა საგრძნობლად დიდია.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *