ფერმერები აზიური ფაროსანას შესახებ

ატამი, ვაშლი, მსხალი, კარალიოკი, ალუჩა – სოფელ თამარისის მოსახლეს ივანე მანთეშაშვილს საკარმიდამო ნაკვეთში

სხვადასხვა ხილის კულტურა აქვს. მოსავლის ნახევარს საკუთარი მოხმარებისთვის იყენებს, ნაწილს კი ყიდის.  ამბობს, რომ ბოლო წლებში, უმეტესად დასავლეთ საქართველოში გავრცელებული მავნებელი, ამ შემოდგომაზე უკვე საკუთარ ბაღშიც იხილა. ,,ზაფხულში არ დამიფიქსირებია, ახლა კი ვხედავ გამრავლდა… მწვანე მწერია, ვფიქრობ, აზიური ფაროსანა. შევამჩნიე კარალიოკზე, პომიდორზე… ალუჩაზე ჯერ არ მინახავს“,- ყვება ფერმერი.

ივანე ამბობს, რომ აზიურმა ფაროსანმა უკვე მის ბაღში არსებული კულტურების მოსავალის ხარისხზეც იმოქმედა. ,,დააზიანა ნაყოფი… აფუჭებს პომიდორს, კარალიოკის ზედა მხარე სულ გადაშავებული იყო“,- სწუხს ფერმერი.

მენთეშაშვილის თქმით, აზიური ფაროსანა საკუთარ ნაკვეთებში მისმა თანასოფლელებმაც შენიშნეს.

ქვემო ქართლში, ცხელ ხაზზე, აზიურ ფაროსანაზე შემოსული ინფორმაცია

ისევე როგორც მთელ საქართველოში, ქვემო ქართლშიც აქტიურად მუშაობს სურსათის ეროვნული სააგენტოს ცხელი ხაზი, სადაც მოსახლეობა აზიური ფაროსანას შესახებ მათთვის საინტერესო კითხვებს სვამს, ხან კი უწყებას მავნებლის შესაძლო გავრცელების შესახებ აწვდის ინფორმაციას. სააგენტოში ამბობენ, რომ იყო შემთხვევები, როდესაც ადგილობრივებმა საკუთარ ბაღებში მავნებლის გავრცელების შესახებ დაიჩივლეს, თუმცა ადგილზე მისულ სპეციალისტებს აზიურის ნაცვლად საქართველოსთვის უკვე კარგად ნაცნობი, მწვანე შეფერილობის ფაროსანა დახვდათ. ,,ცხელი ხაზი უწყვეტ რეჟიმში მუშაობს, ფერმერთა ნაწილი აზიური ფაროსანას შესახებ ინფორმირებულია, თუმცა მოსახლეობის ნაწილი დაბნეულია და ჩვენს ქვეყანაში უკვე წლობით გავრცელებულ მწერების მავნებლობასაც კი აზიურ ფაროსანას უკავშირებენ“, – განმარტავენ უწყებაში. მათი თქმით, მოქალაქეებისგან შემოსული ინფორმაცია ნებისმიერ შემთხვევაში მოწმდება და მითითებულ ადგილებს მათი ფიტოსანიტარები სტუმრობენ.

სეს-ი ქვემო ქართლში აზიური ფაროსანას გავრცელებას უარყოფს

აზიური ფაროსანას თემაზე მოსახლეობასთან აქტიურ კომუნიკაციაზე საუბრობს სურსათის ეროვნული სააგენოს ქვემო ქართლის რეგიონალური სამსახურის უფროსიც. მირანგულა ლიპარტელიანის თქმით, ინფორმაციის გადამოწმება შეუფერხებლად მიმდინარეობს, თუმცა მიმდინარე წელს რეგიონში დამონტაჟებული 600 ფერომონზე აზიური ფაროსანას გავრცელება არ დადასტურდა. ,,ფერომონები რეგიონის ყველა მუნიციპალიტეტსა და სოფელშია დამონტაჟებული, მონიტორინგის შედეგები სასიხარულოა, თუმცა აზიური ფაროსანას გავრცელების შემთხვევაშიც, მასთან საბრძოლველად მზად ვართ“, – ამბობს უწყების წარმომადგენელი. ლიპარტელიანის თქმით, პრევენციისთვის რეგიონში ფიტოსანიტართა ჯგუფია მობილიზებული.

 

 

 

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *