საქართველოს მესამე პრეზიდენტის მიხეილ სააკაშვილის ოჯახი, 5 მაისს, მთავრობის ადმინისტრაციასთან საპროტესტო აქციას გამართავს.
ამის შესახებ მიხეილ სააკაშვილის ძმამ, გიორგი სააკაშვილმა განაცხადა.
„დღითიდღე ვხედავთ როგორ მძიმდება ჩემი ძმის მდგომარეობა. ძალიან აღელვებული ვარ, ვინაიდან ვხედავ, რომ ადამიანი, სრული გაგებით, იღუპება. მე ვალდებული ვარ განვაცხადო, აღარ არის ლოდინის დრო! რამდენიმე დღის წინ განვაცხადე, რომ ვაპირებდი რეგიონებში სიარულს. ორი დღე ვაკვირდებოდით მიმდინარე პროცესებს, გვესმის ქილიკი და ჩვენი ოჯახის შეურაცხყოფა, რომ „საჭმელი ჭამოს“, „არაჟანთან ერთად გადაადგილდება“. მივმართავ საქართველოს ხელისუფლებას – გონს მოეგეთ! აღარაა დრო საქართველოს ყოფილ პრეზიდენტს ასე მოექეცით, რომელსაც საქართველოს წინსვლასა და შენებაში ძალიან დიდი წვლილი მიუძღვის. ამიტომ ოჯახმა გადავწყვიტეთ ხვალ, კანცელარიასთან 19:00 საათზე ვაორგანიზებთ აქციას, რომელიც იქნება იმისთვის, რომ საქართველოს ხელისუფლებას საქართველოს მოსახლეობის ხმა გავაგონოთ. ეს არის ჩვენი ბოლო შანსი, რომ გადავარჩინოთ ადამიანის სიცოცხლე,’’-ამბობს გიორგი სააკაშვილი.
ის საზოგადოებას, ასევე პოლიტიკურ პარტიებს მხარდაჭერისკენ მოუწოდებს.
,,მივმართავ პოლიტიკური პარტიების წარმომადგენლებს – არ აქვს მნიშვნელობა „ნაციონალური მოძრაობის“, „ქართული ოცნების“ თუ სხვა პოლიტიკური მიმდინარეობის მომხრე ხართ. ერთი არის ცხადი, ადამიანი ითხოვს, ოჯახი ითხოვს შველას და ვინაიდან საქართველოში ყოველთვის იყო და არის ოჯახის კულტი, მივმართავ თითოეულ ოჯახს, დებს, ძმებს, მშობლებს, გვერდით დაგვიდექით და გადავარჩინოთ ადამიანის სიცოცხლე, ვინაიდან ყოველი წუთი შეიძლება დადგეს ფატალური. ჩვენ საქართველოს ისტორიაში გვქონია ძალიან ბევრი შემთხვევა, როცა გაგვიწირია ადამიანები, რომელთაც საქართველოს მშენებლობაში ლომის წილი მიუძღოდათ“, – განაცხადა გიორგი სააკაშვილმა.
რუსთავის #12 სასჯელაღსრულების დაწესებულებაში მყოფი მიხეილ სააკაშვილის ჯანმრთელობის მდგომარეობა დღითიდღე მძიმდება. კონსილიუმის წევრების განმარტავენ, რომ ექსპრეზიდენტს საკვების მიღება სურს, თუმცა მას ამის საშუალება ფიზიკურად არ აქვს.