ლიეტუვას საგარეო საქმეთა მინისტრის განცხადებით, რუსეთის პრეზიდენტ ვლადიმერ პუტინის თანამდებობიდან გადაყენება ერთადერთი გზაა მოსკოვიდან მომავალი საფრთხისგან დასავლეთისა და მისი მოკავშირეების დასაცავად.
გაბრიელიუს ლანდსბერგისის თქმით, ფაშიზმზე გამარჯვების დღეს პუტინის ყოველწლიური გამოსვლა და გენერლების “პირქუში სახეები” აშკარად აჩვენებდა, რომ რუსეთი უკრაინასთან ომში წარუმატებლობას განიცდის.
,,ჩვენი გადმოსახედიდან, სანამ დღევანდელი რეჟიმი იქნება ხელისუფლებაში, მის გარშემო მყოფ ქვეყნებს გარკვეულწილად საფრთხე ემუქრებათ. არა მხოლოდ პუტინი, არამედ მთელი რეჟიმი უნდა შეიცვალოს, რადგან, შეიძლება წავიდეს პუტინი, თუმცა მის ადგილას შემდეგ სხვა პუტინი მოვიდეს.
სანამ რუსეთის ტერიტორიის გარეთ ომების წარმოების განზრახვა არსებობს, მის გარშემო მყოფ ქვეყნებს ყოველთვის საფრთხე ემუქრება. მათთვის, ვინც ეჭვობდა 2008 წლის შემდეგ საქართველოში და 2014 წელს, როდესაც დაიწყო პირველი ომი უკრაინაში, დადასტურდა, რომ რუსეთი აგრესორი ქვეყანაა. ეს ძალიან ნათელია,” – აცხადებს გაბრიელიუს ლანდსბერგისი.